هيوس.. حكموا العالم - هتلر

هيوس.. حكموا العالم - هتلر


هتلر وما أدراك ما هتلر..!!
هتلر من أشهر الحكام المصابين بجنون العظمة..

الهوية النازية.. خطابه القوي والمؤثر.. الكاريزما العالية.. اختلاق قدسية العرق الآري.. عدائه لليهود..
سياسته التوسعية.. طموحه في السيطرة على العالم.. خروجه عن المألوف ف اللعبة السياسية..
كل هالشغلات صنعت منه شخصية اشبه بالأسطورة.. والى اليوم الناس عندها فضول تتعرف اكثر على معالم هالشخصية الغريبة..

اسمه أدولف هتلر..
جابته أمه عام 1889 في النمسا.. ابوه اسمه ألويس هتلر.. وجده (ابو ابوه) مجهول مو معروف مين..!
ابوه كان قاسي عليه ودايم يكافخ فيه.. ماراح اقول بعد وين كان يطقه اكثر شي :)

هتلر كان يحلم يصير رسام، لكن ابوه كان يبيه يصير مثله موظف جمارك (الله والوظيفه عاد)
بعد وفاة ابوه ترك المدرسة بدون مايكمل ثانوي وسافر الى فيينا علشان يدرس في اكاديمية الفنون الجميلة لكنهم ماقبلوه.. وياريتهم قابلينه كان طلع نفسيته على اللوحات بدل مايطلعها على الأوادم..!

المهم..
ماتت امه بعد فترة.. وانقطعت عنه معونة الايتام.. وصار يعيش في مأوى للمشردين في فيينا..

بعدها سافر الى المانيا.. وبعد ما وصلها بـ سنه قامت الحرب العالمية الأولى عام 1914..
التحق بالجيش الألماني.. واشتغل بشجاعة مراسل بين الكتائب في الجبهة..
حصل على وسامين مهمين في الجيش الألماني..

عام 1919 انتهت الحرب العالمية الأولى بـ معاهدة فيها بنود مذلة جدا لألمانيا.. تأثرت منها اقتصاديا وسياسيا..
علت الأصوات ضد رجال السياسة والاقتصاد واليهود كمسببين للهزيمة.. الشعب الألماني زعل.. وزعلهم كله تجمع حقد في قلب هتلر..!

عاد يقولوا الى هذي الفترة كان شنب هتلر كبير.. لكنه قرر يشيل شنبه.. ويخلي بس نقطة صغيرة تحت خشمه للذكرى.. وكانت هالقصة موضة في ذاك الوقت.. يسموها قصة "فرشاة الأسنان"..
وهذي فيها رسالة حق اللي يقولوا ان السوالف الكبيرة يبيلها شنبااات.. خل يشوفوا هتلر شلون هز العالم بـ ربع شنب..!

ماعلينا..
الشرطة الألمانية عينت هتلر جاسوس على الأحزاب السياسية.. ومن ضمنها حزب العمال (الحزب النازي)..
دخل الحزب كـ جاسوس.. لكن الوضع جاز له وانضم للحزب وسحب على الشرطة (من يومه قليل خاتمة :))..
ولأنه يمتلك مهارة عالية في الخطاب.. خلال سنة وحدة صار رئيس الحزب والمتحدث الرسمي..
هتلر اجرى تعديلات على مبادئ الحزب.. وغير اسمه.. واعتمد الصليب المعقوف كـ شِعار له..

عام 1923 عمل محاولة انقلاب فاشلة ودخل السجن.. انسجن 5 شهور.. وفي السجن بدأ يكتب مذكراته ونظرياته النازية في كتاب سماه "كفاحي"..
طلع من السجن ودخل الانتخابات عن طريق الحزب وفاز.. وعام 1933 صار هتلر مستشار المانيا بصلاحيات رئيس..

اصلح الوضع الاقتصادي.. قضى على البطالة.. رسخ مبادئ النازية وقداسة العرق الآري ومعاداة السامية واليهود.. واشتغل اعلامه بقوة في خدمة هالهدف..

المفارقة العجيبة.. هي وجود احتمال ان يكون هتلر أصله يهودي..! بحكم انه مجهول النسب من جهة أبوه..
ومن جهة أمه بعد.. استغفر الله.. الواحد ماوده يحط بذمته.. لكن مطلعين كلام على جدته انها كانت تخدم في بيت واحد يهودي وحملت هناك..!

على كل حال.. هتلر ماترك مجال للألمان يسألوه أنت مين؟!
اشتغل كثير في تلميع صورته.. وقدم نفسه كـ عاشق ذابت هويته في النازية وألمانيا..
وجلس يعطيهم من هالكلام الماخوذ خيره.. كان دايم يقول مثلا: انا ماراح اتزوج.. لأني تزوجت ألمانيا..!
وهو الهتلي عنده صديقته "إيفا براون" مايستغني عنها ولا يوم..

انزين ماعلينا..
هتلر رمم الجيش الألماني المنهار.. وانعش صناعة الأسلحة الممنوعة.. وعام 1938 كون له قوة وحلفاء وبدأ عملية الثأر والتوسع بضم النمسا وتشيكوسلوفاكيا..
طمع زيادة.. وغزا بولندا عام 1939.. عاد زعلت بريطانيا وفرنسا واعلنوا الحرب.. وقامت الحرب العالمية الثانية في نفس العام..

الى سنة 1941 ظل هتلر مسيطر على وضع الحرب.. لكنه من جنونه في سياسة التوسع والسيطرة راح تحرش في الإتحاد السوفييتي(روسيا وربعها).. وهناك عاد الهيس الثاني "ستالين".. والهيوس تعرف لبعضها..
ستالين عزم وحط هتلر براسه.. وصارت المعمعة وتوالت هزائم المانيا على يد السوفييت.. ولا جت سنة 1945 سلمك الله الا والروس في برلين يتقهووا عند هتلر..

هتلر هنا استجن.. وقال حق احد الضباط من ربعه: اقول يالخوي.. الحين مابقى عندنا الا خطة الأرض المحروقة..!
قال له: شلون يعني؟!
قال هتلر: يعني نحرق المانيا ونسلمها لهم رماد..!
رد عليه: قوول لـمك بس.. الى هنا وخلاص ترا.. هذا حدنا وياك..!

عاد هنا قرر هتلر ينتحر.. نزل السرداب واخذ معه الفقيرة صديقته بعد ماتزوجها بشكل رسمي.. وبدال مايعطيها كيكة العرس.. عطاها كبسولة "سيانيد" حطتها بثمها..
وهذي بعد من قلة الخاتمة.. ولا اذا انت تبي تنتحر مالك غرض بعد تجبر هالفقيرة تنتحر معك.. لكن بعد الهيوس مالهم خوي..!

المهم..
هو بعد اخذ له كبسوله "سيانيد".. بس شافها ماجابت راسه.. قام حط المسدس بثمه وثور على روحه..
وبناء على وصيته.. اخذوا جثته وجثة زوجته وحطوهم بحفره وحرقوهم..!

اخيييير..
راح هتلر.. بعد ماتسبب في حرب أكلت 73 مليون نفس..!!!
والوعد هناك عاد خل يرقعها.. يبيله ست سنوات يسردوا له اساميهم بس..!


ابو جواد،،،